19/10/2026
تيفو لي هزو الرجاويين ف نيجيريا هو مانيفسطو سياسي وفكري كيبين الوعي التاريخي ديال الكورفا سود لي ضربوا كتر من 5000 كيلومتر باش يحولوا المنصة لمنبر كيفضح تاريخ استنزاف القارة السمراء .
الميساج المركزي لي مكتوب بالبونط العريض تحت اللوحات FROM THE CONTINENT OF STOLEN RICH يعني من القارة ذات الثروات المسروقة وتحت منو مباشرة مكتوب ALL WE SEEK IS THE GOLDEN CUP يعني كل ما نبتغيه هو الكأس الذهبية ..
كلاش بعقلو للنظام الاستعماري الغربي والربط لي داروا واعر بزاف گالو فيه الجراد كنطالبو بكأس الذهب كحق رياضي ولكن فنفس الوقت كنذكروا العالم بلي الذهب والألماس والپترول واليورانيوم ديال هاد القارة تسرقوا لعقود من طرف القوى الاستعمارية أوروبا وأمريكا لي اليوم كيبغيو يعطيو لإفريقيا دروس فالحرية !
اللوحة الوسطانية الفوقانية مكتوب عليها AFRICA'S SOUL أي روح إفريقيا وكيبان فيها رجل لابس تقليدي كيمارس طقوس مرتبطة بالأرض ديالو وهادشي كيرمز للروح الإفريقية لي بقات حية وصامدة ضد قرون ديال الاستعباد ومحاولات طمس الهوية..
هاد اللوحة كتقيس عمق الفلسفة الإفريقية بحال فكرة الUbuntu والNegritude باش توصل ميساج بأن الهوية والقوة ديال هاد الشعوب نابعة من جذور صحيحة مبغاتش تستسلم بالرغم من گاع المأسي والمجازر التاريخية.
على ليمن كاين لوحة فيها خريطة القارة ومكتوب عليها AFRICAN REALITY أو الواقع الإفريقي وكتوضح برسم سريالي كيفاش اليدين ديال القوى الخارجية أوروبا وأسيا كيف مكتوبين فالجناب باقين متحكمين فالقارة وكيقسموا الثروات ديالها وهادي قراءة جيو سياسية هربانة من جمهور ديال الكرة كيبينوا فيها أن الاستقلال لي خداتو الدول الإفريقية فالقرن 20 كان غير استقلال صوري على الورق ولكن التبعية الاقتصادية والمالية باقا مستمرة وكتخنق الشعوب.
فاليسار لتحت لي طرباتني بزاف ركزات على دويلات كتعاني من استنزاف حاد وممنهج ومكتوب فيها أسماء الكونغو و جنوب إفريقيا و غانا والنيجر وهاد الاختيار ماجابهوش من راسهم هو ربط مباشر بالواقع حيت الكونغو لي غارقة فالدم على قبل ثروات الكولتان و النيجر ومأساة اليورانيوم وجنوب إفريقيا مع تاريخ الفصل العنصري وغانا لي استنزفوها فـتجارة العبيد ونهب الذهب ..
هاد الجزء بوحدو هو تضامن قاري عابر للحدود كيبين أن الكورفا سود متبنية قضايا الشعوب المقهورة وماشي معزولة على محيطها واللوحة الأخيرة هي لاكريم فريش كتختم بـصرخة الخلاص: AFRICA MUST BE FREE بمعنى إفريقيا يجب أن تكون حرة مع رسم ديال التحرر من الأغلال والقيود..
هاد التيفو فالمجمل هو درس فتحليل ما بعد الاستعمار كيرجع لكورة الهوية الشعبية ديالها فالوقت لي الجمعيات والشركات الكروية باغا ترجع اللعبة غير بيزنيس وتجارة جمهور الرجاء استغل الماتش فنيجيريا باش يثبت للعالم بلي الرجا مدرسة فكرية هازة معها هموم قارة بأكملها وفأي تيران حطات فيه رجليها كتخلي التاريخ ينطق.
كازافوبي ✍️
